कामशेत येथील अल्पवयीन मुलीवरील लैंगिक अत्याचार प्रकरणात आरोपीला शिक्षा; कामशेत पोलिसांच्या तपासाला यश

कामशेत : अल्पवयीन मुलीवरील लैंगिक अत्याचाराच्या प्रकरणात कामशेत पोलिसांनी केलेल्या तपासाला यश आले असून, वडगाव मावळ येथील जिल्हा व अतिरिक्त सत्र न्यायालयाने आरोपी योगेश प्रकाश सोमवंशी (वय ४८, रा. धानोरी, पुणे) याला दोषी ठरवून विविध कलमांनुसार कारावासाची शिक्षा सुनावली आहे. तत्कालीन तपासी अधिकारी तथा सध्या कामशेत पोलीस स्टेशनचे प्रभारी अधिकारी असलेले सहायक पोलीस निरीक्षक आकाश पवार यांच्या तपासकार्याला या निकालामुळे यशाची पावती मिळाली आहे. सरकार पक्षातर्फे सरकारी अभियोक्ता संतोष परदेशी आणि लालचंद ओसवाल यांनी काम पाहिले. कामशेत पोलीस स्टेशनमध्ये २०२३ मध्ये गुन्हा रजिस्टर क्रमांक ५८/२०२३ अन्वये भारतीय दंड विधान कलम ३५४ तसेच बालकांचे लैंगिक अपराधांपासून संरक्षण अधिनियम (POCSO) कलम ८ व १२ अंतर्गत हा गुन्हा दाखल करण्यात आला होता. या प्रकरणाचा तपास तत्कालीन तपासी अधिकारी आकाश पवार यांनी केला. गुन्ह्याच्या तपासादरम्यान आवश्यक बाबींची पूर्तता करून प्रकरण न्यायालयात प्रभावीपणे सादर करण्यासाठी तपास यंत्रणेने प्रयत्न केले. या कामात पोलीस हवालदार आशिष झगडे यांनी महत्त्वपूर्ण सहकार्य केले. तसेच पोलीस हवालदार संदीप शिंदे आणि पोलीस शिपाई सौरभ गायकवाड यांनी न्यायालयीन कामकाजात सहकार्य केले. गुन्ह्याच्या तपासापासून ते न्यायालयीन निकालापर्यंत आवश्यक समन्वय राखणे, पुराव्यांचा पाठपुरावा करणे आणि न्यायालयीन प्रक्रियेसाठी आवश्यक सहकार्य करणे, या बाबी या प्रकरणात महत्त्वपूर्ण ठरल्या.आरोपीला विविध कलमांनुसार शिक्षाजिल्हा व अतिरिक्त सत्र न्यायालय, वडगाव मावळ येथे जिल्हा व अतिरिक्त सत्र न्यायाधीश डी. के. अनभुले यांच्या न्यायालयात या प्रकरणाची सुनावणी झाली. सरकार पक्षातर्फे सरकारी अभियोक्ता संतोष परदेशी आणि लालचंद ओसवाल यांनी काम पाहिले. न्यायालयाने आरोपीला POCSO कायदा कलम ८ अन्वये चार वर्षे सक्तमजुरी आणि १० हजार रुपये दंड. दंड न भरल्यास सहा महिने साधी कैद व अन्य कलमान्वये शिक्षा सुनावली आहे. या प्रकरणातील न्यायालयीन कामकाजासाठी वडगाव मावळ सत्र न्यायालयाचे पैरवी अंमलदार GPSI वाघमारे आणि जिल्हा न्यायालयाच्या पैरवी अधिकारी माधुरी तावरे यांनीही समन्वय साधला.

मोठी बातमी l लोणावळ्यात एमडी ड्रग्जीची मोठी कारवाई; वलवण येथील नीता इन हॉटेल परिसरात २.९१ लाखांचा मुद्देमाल जप्त

Accident News l लोणावळा कुणेगाव हद्दीत रस्ते अपघातात दुचाकी चालकाचा जागीच मृत्यू

लोणावळा ग्रामीण पोलिसांची मोठी कारवाई; २६ वर्षांपासून खुनाच्या गुन्ह्यात फरार असलेला आरोपी पवनानगरमधून जेरबंद

महसूल अधिकाऱ्यांच्या आश्वासनानंतर भाजे ग्रामस्थांचे आमरण उपोषण तात्पुरते स्थगित

लोणावळा : मावळ तालुक्यातील भाजे येथील गट क्रमांक १०० या जमिनीच्या मालकी हक्कासंदर्भात महत्त्वाची प्रशासकीय बाब समोर आली आहे. या जमिनीच्या महसुली अभिलेखांमध्ये जुन्या फेरफार नोंदींबाबत विसंगती आणि एका फेरफार नोंदीत खाडाखोड झाल्याचे निरीक्षण नोंदविण्यात आले आहे. सदरची जागा ही भाजे गावाचे गायरान असल्यामुळे तिच्या बाबत झालेले सर्व व्यवहार हे रद्द करावेत व सदरची जागा भाजे गावाचे गायरान म्हणून घोषित करावी या मागणीसाठी भाजे ग्रामस्थांच्या वतीने 29 ऑक्टोबर रोजी वडगाव मावळ तहसील कार्यालयासमोर आमरण उपोषण सुरू करण्यात आले होते. तहसील कार्यालयाच्या आश्वासनानंतर तात्पुरत्या स्वरूपामध्ये ही आंदोलन मागे घेण्यात आले आहे. दरम्यान फेरफार क्रमांक ३७९ आणि ५७० यांचे महाराष्ट्र जमीन महसूल अधिनियम, १९६६ च्या कलम २५८ अन्वये पुनर्विलोकन करण्यासाठी जिल्हाधिकाऱ्यांची परवानगी मिळावी, अशी विनंती मावळ-मुळशी उपविभागाचे उपविभागीय अधिकारी सुरेंद्र नवले यांनी केली आहे.जुन्या महसुली अभिलेखांतून जमिनीचा इतिहास उघड होणारउपलब्ध अहवालानुसार, मौजे भाजे येथील गट क्रमांक १०० हा पूर्वीचा सर्व्हे क्रमांक ६१ असून, या जमिनीचे एकूण क्षेत्रफळ ४० एकर १७ गुंठे होते. जुन्या सातबारा उताऱ्यांनुसार या जमिनीच्या अभिलेखांमध्ये समाईक इनामदार, गायरान डोंगर आणि संबंधित व्यक्तींच्या नावांच्या नोंदी वेगवेगळ्या कालखंडांत आढळतात.सन १९५३-५४ पासूनच्या महसुली नोंदींमध्ये कोंडीबा धाकू धनगर यांचे नाव दाखल झाल्याचे दिसते. त्यानंतरच्या फेरफार नोंदींमध्ये कुळांची नावे, त्यांची वहिवाट आणि जमिनीच्या नोंदींमध्ये करण्यात आलेल्या बदलांचा उल्लेख आहे. मात्र, काही जुन्या फेरफार नोंदी अभिलेख कक्षात उपलब्ध नसल्याचेही अहवालात नमूद करण्यात आले आहे.फेरफार क्रमांक ५७० मधील खाडाखोडीचा मुद्दा ऐरणीवरजमिनीच्या अभिलेखांची तपासणी करताना फेरफार क्रमांक ५७० मध्ये खाडाखोड झाल्याचे निरीक्षण नोंदविण्यात आले आहे. या फेरफाराच्या अनुषंगाने यापूर्वी दाखल असलेल्या कुळांची नावे कमी करण्यात आली, तसेच कोंडीबा धाकू धनगर यांचे नाव कमी करून जमीन सार्वजनिक गायरान म्हणून नोंदविण्याची कार्यवाही झाल्याचा उल्लेख अहवालात आहे.तथापि, संबंधित फेरफार नोंदीतील बदल आणि त्यानंतर झालेल्या नोंदींच्या पार्श्वभूमीवर फेरफार क्रमांक ३७९ व ५७० यांची पुन्हा तपासणी करून गुणवत्तेच्या आधारे निर्णय घेणे आवश्यक असल्याचे उपविभागीय अधिकाऱ्यांनी नमूद केले आहे.महाराष्ट्र खाजगी वन अधिनियमाचा शेरा कायमगट क्रमांक १०० च्या सातबारा उताऱ्यावर इतर हक्कांमध्ये महाराष्ट्र खाजगी वन अधिनियमातील तरतुदींना अधीन असल्याचा शेरा नोंदविण्यात आला आहे. त्यामुळे या जमिनीच्या हक्कांबाबत आणि व्यवहारांबाबत महसुली अभिलेखांचे महत्त्व वाढले आहे. अहवालानुसार, दुय्यम निबंधक, मुळशी यांच्या कार्यालयात ९ जुलै २०२६ रोजी दस्त क्रमांक ६५४५/२०२६ अन्वये हक्कसोडपत्राची नोंद झाली. त्यानंतर ३ ऑगस्ट २०२६ रोजी दस्त क्रमांक ७३७०/२०२६ अन्वये जमिनीच्या एकूण क्षेत्रापैकी १५ हेक्टर १० आर क्षेत्राचे खरेदीखत नोंदविण्यात आले. या दस्तांच्या आधारे अनुक्रमे फेरफार क्रमांक १५९५ आणि १६०० नोंदविण्यात आले. मात्र, या नोंदींना भाजे येथील ग्रामस्थ आणि इतर संबंधितांनी हरकत घेतली आहे. त्यामुळे दोन्ही फेरफारांबाबत मंडल अधिकारी, कार्ला यांच्या कार्यालयात कार्यवाही सुरू असल्याचे अहवालात नमूद आहे.जिल्हाधिकाऱ्यांच्या निर्णयाकडे लक्षउपविभागीय अधिकारी सुरेंद्र नवले यांनी सादर केलेल्या अहवालात फेरफार क्रमांक ३७९ आणि ५७० यांचे महाराष्ट्र जमीन महसूल अधिनियम, १९६६ च्या कलम २५८ अन्वये पुनर्विलोकन करण्यासाठी परवानगी मागितली आहे. या परवानगीनंतर संबंधित जुन्या नोंदींची कायदेशीर तपासणी करून त्यांच्या वैधतेबाबत निर्णय घेण्याची प्रक्रिया पुढे जाऊ शकते. भाजे येथील गट क्रमांक १०० च्या जमिनीच्या मालकी हक्कांबाबत, जुन्या महसुली नोंदींच्या वैधतेबाबत आणि नव्याने नोंदविण्यात आलेल्या व्यवहारांबाबत आता जिल्हाधिकारी स्तरावर काय निर्णय होतो, याकडे संबंधित ग्रामस्थांचे लक्ष लागले आहे.

स्व. पंढरीनाथ हरिभाऊ सातकर यांच्या जयंतीनिमित्त १५० विद्यार्थ्यांना शिष्यवृत्ती पुस्तकसंचांचे वाटप

मावळ तालुक्यातील भाजे गावात डोंगर गायरान जमिनीच्या खरेदी-विक्रीचा प्रकार उघड; 9 जणांवर गुन्हा दाखल - ग्रामस्थांचे २९ ऑक्टोबरपासून आमरण उपोषणाचा इशारा

मावळ तालुक्यातील सात हजार विद्यार्थ्यांच्या कलागुणांचा झाला गौरव !

मुसळधार पावसाच्या पार्श्वभूमीवर पुणे जिल्हा प्रशासनाची सतर्कता; ३० जणांची सुटका, २७० हून अधिक नागरिकांचे सुरक्षित स्थलांतर

पुणे, दि. ६ जुलै : पुणे जिल्ह्यात ५ व ६ जुलै रोजी झालेल्या अतिवृष्टीमुळे काही ठिकाणी दरडी कोसळणे, पूल पाण्याखाली जाणे तसेच रस्ते व रेल्वे वाहतुकीवर परिणाम होण्याच्या घटना घडल्या. प्रादेशिक हवामान विभागाने रेड अलर्ट जारी केल्यानंतर जिल्हा प्रशासनाने तत्काळ सर्व यंत्रणा सज्ज करून महसूल, पोलीस, अग्निशमन दल, एनडीआरएफ, एसडीआरएफ तसेच स्थानिक स्वराज्य संस्थांच्या समन्वयातून युद्धपातळीवर बचाव व मदतकार्य राबविले. या कार्यवाहीत ३० जणांची सुरक्षित सुटका करण्यात आली, तर २७० हून अधिक नागरिकांचे सुरक्षित स्थळी स्थलांतर करण्यात आले. दुर्दैवाने मावळ तालुक्यातील पाटण येथे घरावर दरड कोसळून ३ जणांचा मृत्यू झाला.जिल्ह्यातील २७ महसूल मंडळांमध्ये ६५ मिमीपेक्षा अधिक पाऊस झाला असून मावळ तालुक्यात सर्वाधिक २३७.३ मिमी पर्जन्यमानाची नोंद झाली आहे.मावळ तालुक्यात तळेगाव परिसरात पाण्यात अडकलेल्या कंपनीच्या बसमधील ३० कर्मचाऱ्यांना अग्निशमन दलाने सुरक्षित बाहेर काढले. ताजे गावातील डोंगरपायथ्यावरील सुमारे २५० नागरिकांचे सुरक्षित ठिकाणी स्थलांतर करण्यात आले. मुंबई–पुणे द्रुतगती मार्गावरील मिसिंग लिंक परिसर तसेच लोणावळा–कर्जत रेल्वेमार्गावरील दरडी हटविण्याचे काम युद्धपातळीवर सुरू असून वाहतूक पूर्ववत करण्यासाठी संबंधित यंत्रणा सातत्याने कार्यरत आहेत.हवेली तालुक्यातील भावडी येथे पाच कुटुंबांतील २२ ते २४ नागरिकांना सुरक्षित स्थळी हलविण्यात आले. देहू, आळंदी आणि इतर पूरग्रस्त भागांमध्ये नागरिकांच्या सुरक्षेला प्राधान्य देत पूल व धोकादायक मार्ग तात्पुरते बंद करण्यात आले. आळंदी येथे इंद्रायणी नदीच्या वाढत्या पाणीपातळीमुळे मंदिर परिसर आणि धर्मशाळांमधील भाविकांना सुरक्षित स्थळी हलविण्यात आले. Bमुळशी, भोर, वेल्हे, खेड, पुरंदर तसेच इतर तालुक्यांमध्ये दरडी कोसळलेल्या ठिकाणी तातडीने यंत्रणा पाठवून दगड-माती हटविणे, रस्ते खुले करणे, बॅरिकेडिंग करणे आणि धोकादायक भागातील नागरिकांचे स्थलांतर करण्याची कार्यवाही करण्यात आली. अनेक ठिकाणी संभाव्य धोका ओळखून वाहतूक बंद करण्यात आल्याने मोठ्या दुर्घटना टाळण्यात प्रशासनाला यश आले. पुणे शहरातील सदाशिव पेठेतील धोकादायक इमारत तातडीने रिकामी करण्यात आली. पिंपरी-चिंचवड व शिरूर येथील घटनांमध्येही संबंधित यंत्रणांनी तत्काळ प्रतिसाद देत मदतकार्य सुरू केले असून बेपत्ता व्यक्तींचा शोध सुरू आहे.मुख्यमंत्री, उपमुख्यमंत्री तथा पालकमंत्री यांनी घेतला परिस्थितीचा आढावा; प्रशासनाला सतर्क राहण्याचे निर्देशमुख्यमंत्री देवेंद्र फडणवीस यांनी दूरदृश्य प्रणालीद्वारे पुणे जिल्ह्यातील अतिवृष्टीच्या परिस्थितीचा आढावा घेऊन जिल्हाधिकाऱ्यांकडून सविस्तर माहिती घेत आवश्यक त्या सूचना दिल्या. उपमुख्यमंत्री तथा पालकमंत्री सुनेत्रा अजित पवार यांनीही जिल्ह्यातील प्रत्येक घडामोडीची सातत्याने माहिती घेत संबंधित यंत्रणांच्या अधिकाऱ्यांशी दूरध्वनीद्वारे संपर्क साधून आवश्यक सूचना दिल्या तसेच पुढील दिवशीही पूर्ण सतर्कता बाळगण्याचे निर्देश दिले.  जिल्हाधिकारी जितेंद्र डुडी यांनी दिवसभर सर्व तालुक्यांतील परिस्थितीचा सातत्याने आढावा घेत महसूल, पोलीस, आपत्ती व्यवस्थापन तसेच इतर संबंधित यंत्रणांमध्ये समन्वय साधून बचाव व मदतकार्य प्रभावीपणे राबविण्याच्या सूचना दिल्या. जिल्हाधिकारी यांच्या मार्गदर्शनाखाली जिल्हा प्रशासनाची सर्व यंत्रणा २४ तास कार्यरत असून परिस्थितीवर सातत्याने लक्ष ठेवण्यात येत आहे. नागरिकांनी अफवांवर विश्वास न ठेवता केवळ अधिकृत माहितीवर विश्वास ठेवावा, अनावश्यक प्रवास टाळावा आणि प्रशासनाच्या सूचनांचे काटेकोर पालन करावे, असे आवाहन जिल्हा प्रशासनाने केले आहे.

मोठी बातमी l भिकमुक्त पुणे जिल्हा मोहिमेचा राज्यस्तरीय निर्धार; भीक मागणाऱ्यांचे होणार पुनर्वसन

मराठी पत्रकार संघाच्या राज्यस्तरीय महाअधिवेशनात मोठी घोषणा; सर्व जिल्ह्यांत पत्रकार भवनासाठी जागा देणार - मंत्री चंद्रशेखर बावनकुळे

सूक्ष्म योगा फाउंडेशनचे पंकज शर्मा यांना आदर्श महाराष्ट्र रत्न पुरस्कार २०२६ प्रदान