भारत-नेपाळचे नाते होणार 'योगमय'! नेपाळचे राष्ट्रीय अध्यक्ष रवी लामिछाने आणि कैवल्यधामचे सुबोध तिवारी यांच्यात नवी दिल्लीत महत्त्वाची बैठक

लोणावळा : नेपाळचे राष्ट्रीय स्वातंत्र्य पक्षाचे अध्यक्ष श्री. रवी लामिछाने आणि लोणावळ्यातील जागतिक कीर्तीच्या कैवल्यधाम योग संस्थेचे मानद सचिव व प्रमुख कार्यकारी अधिकारी (CEO) श्री. सुबोध तिवारी यांची नुकतीच नवी दिल्ली येथे सदिच्छा भेट झाली. भारत दौऱ्यावर आलेले नेपाळचे नेते रवी लामिछाने यांच्या आग्रहाच्या निमंत्रणावरून ही महत्त्वपूर्ण बैठक पार पडली. या भेटी दरम्यान दोन्ही देशांमधील योगिक संबंध अधिक दृढ करण्यावर आणि विशेषतः नेपाळमध्ये योगप्रसाराला गती देण्यावर सविस्तर व सकारात्मक चर्चा झाली.

          या भेटीदरम्यान श्री. सुबोध तिवारी यांनी श्री. रवी लामिछाने यांना लोणावळ्यातील कैवल्यधाम योग संस्थेच्या गौरवशाली कार्याची आणि संस्थेच्या शतकपूर्ती (१०० वर्षे) महोत्सवाची माहिती दिली. कैवल्यधामने गेली अनेक दशके वैज्ञानिक आणि आध्यात्मिक पातळीवर योगाचा प्रचार-प्रसार कसा केला, यावर चर्चा झाली. रवी लामिछाने यांच्यासारख्या अभ्यासू नेत्याशी संवाद साधण्याचा अनुभव अत्यंत आनंददायी होता, अशा भावना तिवारी यांनी व्यक्त केल्या.

       या प्रसंगी श्री. सुबोध तिवारी यांच्या हस्ते रवी लामिछाने यांना भारताचा समृद्ध योगिक वारसा आणि 'इंडियन योग असोसिएशन'चे एक ज्ञान, अनेक परंपरा (One Wisdom, Many Traditions) हे विशेष प्रकाशन सन्मानपूर्वक भेट देण्यात आले. योगाचे विविध मार्ग कसे एकाच उद्देशासाठी एकत्र येतात, याचा उत्तम पुरावा देणारे हे प्रकाशन पाहून लामिछाने अत्यंत प्रभावित झाले.

*भारत-नेपाळ योग संबंध: चर्चेतील ३ महत्त्वाचे निर्णय*

१. नेपाळमधील १०० शिक्षक लोणावळ्यात येणार : नेपाळमधील १०० शिक्षकांचा एक मोठा वर्ग लवकरच लोणावळ्यातील कैवल्यधाम योग संस्थेत विशेष योग प्रशिक्षणासाठी दाखल होणार आहे.

२. कैवल्यधामचे तज्ज्ञ नेपाळला जाणार : आगामी काळात कैवल्यधाम संस्थेतर्फे थेट नेपाळमध्ये योग प्रशिक्षण शिबिरे आणि उपक्रम राबवले जाणार आहेत. यासाठी कैवल्यधामचे वरिष्ठ योग तज्ज्ञ आणि मार्गदर्शक नेपाळचा दौरा करणार आहेत.

३. श्री. रवी लामिछाने लोणावळ्याला भेट देणार : स्वतः नेपाळच्या राष्ट्रीय स्वातंत्र्य पक्षाचे अध्यक्ष श्री. रवी लामिछाने यांनी आगामी ६ महिन्यांत लोणावळ्यातील कैवल्यधाम योग संस्थेला प्रत्यक्ष भेट देण्याचे आश्वासन दिले आहे.

      *योगाच्या माध्यमातून भारत आणि नेपाळचे हे 'योगमय' नाते आगामी काळात अधिक वृद्धिंगत आणि घट्ट होईल. आंतरराष्ट्रीय स्तरावर झालेली ही भेट आणि चर्चा संपूर्ण भारतासाठी अत्यंत अभिमानास्पद आणि गौरवशाली बाब आहे. – श्री. सुबोध तिवारी (मानद सचिव व प्रमुख कार्यकारी अधिकारी, कैवल्यधाम योग संस्था)*