लोणावळ्यात पारंपरिक वाद्यांच्या गजरात आणि शिस्तबद्धतेने गणेशोत्सव साजरा करण्याचे आवाहन

लोणावळा : राष्ट्रीय एकात्मता, सामाजिक सलोखा आणि पारंपरिक संस्कृती जपत आगामी गणेशोत्सव शहरात अत्यंत उत्साहात व शिस्तबद्ध वातावरणात साजरा करण्याचा निर्धार शांतता समितीच्या बैठकीत करण्यात आला. बैठकीत तहसीलदार विक्रम देशमुख, नगराध्यक्ष राजेंद्र सोनवणे, उपनगराध्यक्ष देविदास कडू, मुख्याधिकारी अशोक साबळे, पोलीस निरीक्षक सचिन पाटील, नगरसेवक निखिल कविश्वर, नगरसेवक मंगेश मावकर, महिला व बालकल्याण समिती सभापती स्वपना कदम  यांच्यासह शहर गणेशोत्सव मंडळांचे प्रतिनिधी उपस्थित होते.

प्रशासनाचे मार्गदर्शन व मुख्य निर्णय

तहसीलदार विक्रम देशमुख : गणेश उत्सवाचा मूळ उद्देश राष्ट्रीय एकात्मता जागृत करणे हा होता. सण सर्वांनी आनंदाने आणि विधायक उपक्रमांनी साजरा करावा. स्थापनेपासून ते विसर्जन मिरवणुकीपर्यंत कोणत्याही छोट्या घटनेवरून वाद होणार नाही याची काळजी घ्यावी. मंडळांनी चौकात वेळेचे नियोजन, शिस्त आणि कार्यकर्त्यांची नियुक्ती योग्य प्रकारे करावी. मिरवणुका वेळेत सुरू करून वेळेतच संपवाव्यात; प्रशासनाकडून सर्वतोपरी मदत केली जाईल.

मुख्याधिकारी अशोक साबळे : कायदा व सुव्यवस्थेचे पालन करून उत्सव निर्विघ्नपणे पार पडावा. बाप्पांच्या स्थापनेपासून विसर्जनापर्यंत अमंगल कोणतेही काम होणार नाही याची दक्षता सर्वांनी घ्यावी. विसर्जन मिरवणुकीत प्रत्येक मंडळाला पुरेसा वेळ मिळेल असे नियोजन प्रशासनाने केले आहे.

पोलीस निरीक्षक सचिन पाटील : डीजे ही आपली संस्कृती व परंपरा नाही. यामुळे मोठ्या आवाजात साउंड वाजवणाऱ्यांवर कठोर कारवाई केली जाईल. सर्वांनी पारंपरिक वाद्यांच्या गजरात उत्सव साजरा करावा. ध्वनीप्रदूषणाचे नियम पाळल्यास पोलिसांचे पूर्ण सहकार्य राहील.

नगरपरिषदेची तयारी व विसर्जन घाटांवरील सोयी

नगरसेवक निखिल कविश्वर यांनी सांगितले की, लोणावळ्याला १०० वर्षांची गणेशोत्सवाची मोठी परंपरा आहे. शहरात सर्व जाती-धर्माचे नागरिक गुणगोविंदाने हा सण साजरा करतात.

घाटांची सोय: हुडको, डॅम, ठोंबरेवाडी, जय मल्हार साधना कुटीर, नांगरगाव, तुंगार्ली, वळवण (येथे प्रत्येकी दोन बोटींची व्यवस्था) आणि काचवाला पूल या सर्व ठिकाणी विसर्जन घाटांची सोय करण्यात आली आहे.

सुविधा व नियुक्ती : विसर्जन घाटांवर हाय मास्ट, लाईट व्यवस्था, उंच गाड्या आणि निर्माल्य कलश तैनात केले आहेत. २४ तास अधिकारी व कर्मचारी विसर्जन हौदावर शेवटचा गणपती विसर्जित होईपर्यंत उपस्थित राहतील.

विशेष सत्कार: यापुढे लोणावळा नगर परिषदेच्या वतीने शतक महोत्सव व रौप्य महोत्सव साजरा करणाऱ्या गणेश मंडळांचा विशेष सत्कार केला जाणार आहे.

ध्वनीप्रदूषण नियम व डीजे कारवाईवरून चर्चा

बैठकीत डीजेच्या आवाजावरून चर्चा झाली. शासनाच्या नियमानुसार ७५ डेसिबल ही आवाजाची मर्यादा असून ती ओलांडल्यास डीजे जप्त केला जाईल, असा इशारा प्रशासनाने दिला. यावर हॉटेल व बंगल्यांमध्ये वाजणाऱ्या डीजेवर पोलीस काय कारवाई करतात, असा सवाल नगरसेवक निखिल कवीश्वर यांनी उपस्थित करत पोलिसांचे नियोजन प्रत्यक्षात दिसावे अशी अपेक्षा व्यक्त केली.