मावळ तालुक्यातील पवना धरण 86 टक्के भरले; लोणावळा शहरात 24 तासात 138 मिमी पावसाची नोंद

लोणावळा : लोणावळा शहर व मावळ तालुक्यामध्ये पावसाचा जोर पुन्हा वाढला आहे. 21 जुलै रोजी 24 तासात पवना धरणाच्या पाणलोट क्षेत्रामध्ये 54 मिमी पाऊस झाला असून धरणामध्ये आज अखेरपर्यंत 86% पाणीसाठा उपलब्ध झाला आहे. लोणावळा शहरात देखील मागील 24 तासात 138 मिमी पावसाची नोंद झाली आहे. पावसाने मागील वर्षाची सरासरी ओलांडली आहे.

विशेष म्हणजे 2025 या वर्षामध्ये मे महिन्यापासून पावसाला सुरुवात झाली होती. यावर्षी अवघ्या जुलै महिन्यात 21 दिवसात पावसाने मागील वर्षाची ही सरासरी ओलांडली आहे. सह्याद्रीच्या घाटमाथ्यावर पुढील काही दिवस मुसळधार पावसाची शक्यता हवामान विभागाने वर्तवली आहे. पवना धरणाने यावर्षी उन्हाळ्यामध्ये तळ गाठला होता पावसाळा सुरू होण्यापूर्वी अगदी जून महिन्याच्या अखेरपर्यंत धरणामध्ये केवळ 17 टक्के पाणीसाठा शिल्लक होता. त्यामध्ये मागील महिनाभरात 69 टक्क्याने वाढ झाली आहे.

जुलै महिन्याच्या पहिल्या आठवड्यामध्ये व मागील दोन-तीन दिवसापासून लोणावळा शहर व मावळ तालुक्याच्या घाटमाथ्यावर सुरू असलेल्या जोरदार पावसामुळे मावळ तालुक्यातील बहुतांश धरणे ही तुडुंब भरली आहेत. पावसाचा जोर कायम राहिल्यास धरणांमधून पाण्याचा विसर्ग पाटबंधारे विभागाकडून केला जाऊ शकतो त्यामुळे नागरिकांनी सतर्क रहावे व काळजी घ्यावी.